ТАЯММУМ

Фасллар галма-гал алмашар секин, Ёмғир ёққан жойга бир кун ёғар қор. Ажойиб воқеа бўларди лекин, Менинг наслимдан ҳам чиқса амалдор.

Аввал бошланарди менга хушомад, Жаҳонда кам дея сиз каби зўрлар. Сатрингиз Фирдавсий шеъридан баланд, Асл шажарангиз Амир Темурлар.

Қараб ўтирмасдим менинг ўзим ҳам, Майли, Барчин учун кўкда турсин ой. Оғзаки ижодга кўрсатиб карам, Қуёшнинг отини қўярдим Қултой.

Шаксиз маъқул бўлар мен неки дедим, Кучим етажакдир ҳар қандай ишга. Энг аввал, эринмай ўргатар эдим, Казо-казоларни салом беришга.

Ўзингни камтарин тутмоқлик нечун, Дўлана дардида чиқдинг-ку тоққа. Ўша уруғингнинг ҳурмати учун, Номингни қўйишар бирорта боққа.

Инсон фориғ эмас бундайин ҳисдан, Атайлаб қилмасман уни тараннум. Ахир тониб бўлмас ушбу ҳадисдан: Кимки сув топмаса қилгай таяммум.

7.07.2015