"Шоирнинг Туғилиши"

Азиз китобхон,

Ушбу шеърлар биринчи марта эълон қилинаяпти. 1958-65 йиллар орасида ёзилган. Абдулла ака шу йилларда ёзган шеърларини “Шоирнинг туғилиши” номи билан китоб чиқаришни ният қилган эканлар. 1965 йилда нашр этилган илк китоби, “Митти Юлдуз” га киритилган шеърлар эса қисман улар орасидан танлаб олинган.

Рафиқаси, Ҳанифа Орипова.

Жавоб

Уйга кирдим. Не ҳол, вароқлар ёзиқ

Шамол деразамни очиб кетибди,

Битик қоғозларни титиб аёвсиз

Ҳам уни ҳар томон сочиб кетибди...

Шамоллар!...

Ҳазилинг бу уйдан жавобсиз кетмас

Демасман: “Қоғозни учиролмайсан”:

Ҳар қанча уринма, йўқ, кучинг етмас

Сатрни ўрнидан кўчиролмайсан!

***