NADOMAT

Абдулла Орипов

НАДОМАТ

Қўлингдан нима ҳам келарди, — дединг,

Ногаҳон зарбадан титради бу қалб.

Бир замон мухлису хайрихоҳ эдинг,

Сендан чиқмас эди бунга ўхшаш гап.

Кўп йиллар тунингни ёритиб турган

Битта чироқ эдим, унутдингми ё?

Гуё соям эдинг ёнимда юрган,

Менсиз ўтмас эди кунларинг асло.

Афсус, ўша дамлар кетди қайтмасдан,

Энди узолмасман кўкдан юлдузни.

Гапларим эскирар ҳали айтмасдан,

Минг бир саралайман арзирлик сўзни.

Шукур, кар эмасман ё эмасман ланг,

Шукур, кўзларим ҳам очиқдир ҳамон.

Оёқ остингдаги чоҳни кўрмасанг,

Огоҳ қиладирман, билгил, қадрдон.

Уча олмасам ҳам самога қадар

Шамол ўтиб турар ўнгу сўлимдан.

Оддий инсонликни унутсанг агар,

Ўшани эслатиш келар қўлимдан.

Ҳали яхшиликдан ўлмаган ҳеч ким,

Ёлчиган ҳам эмас ёмон от билан.

Жаннат дарвозасин қошида балким

Сени қарши олгум илтифот билан.

2014 йил 1 октябрь

NАDOMАT

Qoʼlingdan nima ham kelardi, — deding,

Nogahon zarbadan titradi bu qalb.

Bir zamon muxlisu xayrixoh eding,

Sendan chiqmas edi bunga oʼxshash gap.

Koʼp yillar tuningni yoritib turgan

Bitta chiroq edim, unutdingmi yo?

Guyo soyam eding yonimda yurgan,

Mensiz oʼtmas edi kunlaring aslo.

Аfsus, oʼsha damlar ketdi qaytmasdan,

Endi uzolmasman koʼkdan yulduzni.

Gaplarim eskirar hali aytmasdan,

Ming bir saralayman arzirlik soʼzni.

Shukur, kar emasman yo emasman lang,

Shukur, koʼzlarim ham ochiqdir hamon.

Oyoq ostingdagi chohni koʼrmasang,

Ogoh qiladirman, bilgil, qadrdon.

Ucha olmasam ham samoga qadar

Shamol oʼtib turar oʼngu soʼlimdan.

Oddiy insonlikni unutsang agar,

Oʼshani eslatish kelar qoʼlimdan.

Hali yaxshilikdan oʼlmagan hech kim,

Yolchigan ham emas yomon ot bilan.

Jannat darvozasin qoshida balkim

Seni qarshi olgum iltifot bilan.

2014 yil